Ape masih butuh Allah tulungin kite di kala suseh..? - Betawi katrok... memang katrok..
« Home | Hari ini ada yg ulang tahun.. »
| Selamat Datang Ramadhan 1429 H »
| Jeruk Salak??? Kopdar Teruzz! Makan Teruzz! Tag Te... »
| Babe saye punya dua cucu baru lho.. »
| Ngiler kue tart yg enak..! »
| Dirumah.. Tidur.. Sendiri.. »
| D I C A R I : R E L A W A N »
| Blogger Brotherhood : Care & Fair..! »
| Akhirnya Ketemu Juga! »
| Sempurna, Tapi Bukan Aku! »
Senin, 08 September 2008
Ape masih butuh Allah tulungin kite di kala suseh..?
Sedang kite ngulurin tangan buat nulungin orang laen kaga mao..!

Kaga bermaksud sok paling paham nih ye, tp tau ga.. saat ada orang dateng buat minta bantuan ato pengemis nadahin tangan mohon sedikit rejeki, bisa jadi itulah kesempetan yg Allah kasih ama kite buat nulungin orang laen, sehingga Allah juga berkenan nulungin kite pas giliran kite suseh..
Mungkin ini artinye kalo masih butuh ditulung Allah, jangan pernah nolak buat nulungin orang laen..

Allah lah yg udeh gerakin hati orang untuk datengin kite demi sebuah pertolongan yg bisa kite usahain.. Allah lah yg nuntun langkah orang itu untuk jumpain kite..
Bisa aje orang itu dateng pada orang laen, bukan kite. Tapi Allah udeh milih kite untuk nulungin die. Allah kasih kite kesempetan itu karna rahmatNya..
Ape pantes kite sia-siain kesempetan itu..?

Kadang kite ini kalo sedekah seringkali berprasangka & sibuk ngitung dg alesan kite sendiri juga masih suseh..
Padahal katanye nih kalo kite mao nulungin orang laen di saat kite suseh, justru itulah makna keikhlasan yg sesungguhnye..
Di saat kite mampu lalu nulung orang laen itu mah hukumnye wajib, tp kalo pas kite lagi suseh..? Brarti nulungin orang laen pada saat suseh bisa dibilang perbuatan yg istimewa kan..?
Jadi kaga usah bahagia dulu lah kalo ditakdirin jadi orang kaya..
Dan jangan pernah kecil ati kalo takdir kite idup blangsak..
Semua ade hikmahnye yg intinye adalah ngasih liat wujud nyata kebesaran Allah berupa kasih sayang Allah pada mahluknye..

Kite ini punya ape sih? Apa yg nempel di badan kite nih cuman pinjeman, semua mutlak milik Allah yg suatu saat gampang aje diambil lagi kalo Allah mao..
Tinggal pilih dah, mao pake cara baek2 ato diambil paksa..
Hah? Dipaksa..? Maksudnye..?
Heheee.. simpel aje sih.. dg baek2 itu ya liwat ‘kesempetan’ yg udeh saye bilang di atas tadi, sedangkan dipaksa itu bisa jadi dalam bentuk musibah.. Naudzubillah..

Masihkah kite kaga mao sedekah..?
Masihkah ati kite keras kaya batu sampe kaga tergerak buat ngulurin tangan demi nulungin orang laen ato nyisihin sebagian rejeki..?
Siap kaga kalo suatu saat Allah murka & ngambil paksa semua milikNya yg kite pinjem..?

Plis deh! Hari gini masih aljabar ajah! Ngituuung mulu..
Astaghfirullah.. Ama Allah jangan pernah itung2an..
Kaga bermaksud sok tau, sok lurus, sok bener apalagi sok dermawan ye.. tapi saye sering banget denger omongan ini saat pengemis nyamperin kite..
Masih seger udeh minta2..
Dasar pemales, kebiasaan tuh..
Ngapain ngasih, bikin dia keenakan kaga mao kerja..

(dan masih banyak kalimat laen yg sejenis..)

Yaelaaah.. udah kaga mao ngasih, pake bonus ngedumel segala..
Apa kaga kepikir kalo itu artinye rugi dobel..?
Rugi karna kite udeh sia2in kesempatan Allah dg nulungin orang laen supaya ntar Allah juga mao nulungin kite pas lagi suseh dan rugi karna kite dapet bonus kerutan baru di muka karna sibuk ngedumel.. Wedew..!

Masalah orang itu pemales, masih seger, kebiasaan, keenakan dll itu sih urusan dia ama Allah, sedang urusan kite nih gimane cara manfaatin kesempatan Allah dengan maksimal.
Titik ampe situ, jangan kite cemarin dg hal yg bakalan ngurangin bahkan ngilangin nilai ibadah kite di catetan Allah.

Saye juga pernah denger kata2 ini lho..
Ada yg lebih pantes kite kasih koq.. Panti Asuhan, Rumah Jompo dll. Kalo mao sedekah mendingan ke situ aja, ngapain ngasih pengemis kaya gini..

Ampun deh! Helooow.. syape sih luuuuuu..?
Kalo emang kaya raya sih masih pantes kalo ngomong gituh, nah timbang urat mlarat idup blangsak tujuh turunan pake begaya mo nyantunin yg begonoan..
Dikasih kesempatan pake cara yg gampang malah nyari yg ribet..

Allah paling tau siape kite, makanye Allah adil dg ngasih kite kesempetan dg takeran yg sesuai kemampuan kite masing2.
Timbang ngasih serebu perak doang ato bagus lagi kalo bisa ngasih goceng-ceban, koq kayanye berat amat..!
Tp kalo emang dasarnye pelit mah jangan pake alesan mending ngasih ke panti..!
Ini bukannye ngeremehin kemampuan orang suseh yg beneran punya niat mulia mo nyumbang ke panti lho ye..
Kalo beneran bisa dibuktiin sih bagus, syukur alhamdulillah dah tuh.. Tapi kalo cuman ngomong doang?
Coba pikir deh, pantes kaga sih kite ujug2 dateng ke panti ngasih serebu perak..? Ato sratus rebu lah..
Emang sih sedekah tuh boleh brape aje sesuai kemampuan & keikhlasan, tapi ape salahnye kalo dipantesin supaya yg nerima juga berasa manfaatnye..
Kalo emang kite mampunye ngasih dikit, yaudah kasih aje tuh yg ada di depan mate, yg dateng nyamperin kite..
Biar dikit kalo sering pan ahirnye banyak juga.
Timbang ngayal nyumbang yg gede buat panti, tapi duitnye kaga ngumpul2 ato sekalinye duit ngumpul tau2 kite lupa ngasih, ato kite kaga ada umur buat nyumbang..?
Brabe kan tuh.. Rugi seumur2 dah.. Bakalan nyesel kaga ada abisnye..

Makanye.. mumpung Ramadhan, bulan spesial dari Allah yg banyak bonusnye, mending kite banyakin sedekah karna pahalanye bakalan Allah lipet gandain..
Ibaratnye kite kerja segitunye banting tulang stengah mati kringetan ampe kolor demi ngumpulin bekal buat mudik pulang kapung yg cuman brape hari doang, masa kite kaga mao usaha ampe segitunye juga demi ngumpulin bekal buat mudik ke ‘kampung akherat’ dimane kite kaga bakalan balik lagi ke dunia alias tinggal selamanye di sono..

Semoga kite termasuk orang yg Allah kasih kesempetan buat nulungin orang laen, sehingga kite punya bekal yg banyak biar bisa bahagia atawa hepi ending di akherat ntar..

Label: , ,

 
posted by Sinopi at 05.39 | Permalink |


54 Comments: