Akhirnya tiba juga acara yg saye tunggu2…
Disnileeeeen, Ayem kamiiiiiiing…!

Hongkong Disneyland dibagi2 menjadi 4 kawasan : Adventureland, Main Street-USA, Fantasyland & Tomorrowland. Luasnye sih kalah gede dg Dunia Fantasi nye kita. Sebentar aje saye udeh bisa keliling Disnilen, kalo Dupan kan bisa ampe kaki gempor tuh! Kabar yg saye denger, Disney HK kalah seru dg Dupan. Artis2 kite yg ditanyain di inpotemen pun bilang gitu. Tapi kata saye sih : Kaga ah! Disnilen keren banget & seru koq… emang lebih kecil dari Dupan tp kata saye lebih oke (mungkin karna saye udeh sering banget ke Dupan, jadi bosen kali yeh…)
Sayang nye dg karcis HK$ 290 wik deys & HK$ 350 wik en, saye cuma sempet maen2 di 3 wahana doang. Nyebelin ga sih…
Niatnye mo puas2in diri maen di Disnilen tapi ternyata cuman bisa bentaran doang. Gara2 kite dateng nye kesorean. Biasa lah, slain urusan beli jamu, imigrasi & dateng ke JC Jewellery yg ga penting itu, rombongan beser ini bener2 ngabisin banyak waktu di jamban. Ga epektip n episien banget!

Pertama kali masuk Disnilen, kite disambut aer mancur yg di atas nye ada mikimos lagi surping. Abis itu langsung ke kawasan Fantasyland untuk liat Mickey’s Philhar Magic. Padahal sebelom nye kite ngelewatin Tomorrowland & pengen banget masup ke Space Mountain, katanye di sini tuh model halilintar kaya di Dupan tapi gelap & banyak bintang kaya lagi di luar angkasa. Wah, kaya nye keren banget & tantangan buat dicoba, tuh. Tapi karna rombongan, yaudah deh saye ngalah. Untungnye di Mikis Pilar Mejik pertunjukannye keren abis!!! Di sini kite nonton pilm 4 dimensi.

Singkat critanye, yg kite tonton tuh kaya beneran ada. Misalnye waktu flute nye Donal melayang, kite brasa kaya ampir kepentung. Waktu kue2 pada terbang, kuenye kaya beneran ada depan mata! Eh wangi ntu kue juga beneran ke endus ama idung kite lho… Bikin iler netes, abisan wangi banget. Trus waktu Donal disiram aer se ember, kite juga beneran kecipratan aer. Yg paling gawat waktu Donal jatoh dari langit pas ketemu Aladin & Putri Yasmin, soalnye puyeng banget kaya kite beneran melayang2 jatoh dari langit. Serem!

Trahir nye si Donal kelempar ke arah kite kaya beneran kluar dari layar. Pas kite nengok ke blakang tau2 aje ada si Donal lagi nancep di tembok blakang penonton cuman kliatan bokong ama kaki nye doang yg begerak2. Seru dah pokok nye! Maklumlah, saye kan Betawi Katrok nyang baru liat tontonan canggih nyang kaya beginian… kesian yeh

Di Dupan kaga kaya gini kan yah? Tp denger2 sih di Glanggang Samudra Ancol ada juga pilm 4 dimensi tentang monyet2 gitu. Saye kaya nye kudu kesane tuh buat ngebukti in. Lagian jangan sampe saye ketinggalan cerita ah, saye ude nyampe HK nonton pilm 4D masa di negri sendiri saye belon pernah. Katrok banget kan tuh…

Abis dari situ saye ke kawasan Adventureland. Saye masup ke Jungle River Cruise. Di sini seru banget...! Sepanjang naek prahu ntu kite dikagetin macem2. Awalnye sih cuman lewat rumah pohon nye Tarzan yg antik banget (padahal kite bisa kesana lho, pake pasilitas Rafts to Tarzan Treehouse, tapi kaga sempet) trus ada gajah yg tau2 aja nyemprotin aer dari belalainya ke arah kite, trus disambut buaya, uler & yg paling ngagetin tau2 aje dari dalem aer kluar kuda nil yg gede banget langsung buka mulut yg lebarnye se baskom!
Ada juga pemandangan 3 simpanse yg lagi ngacak2 tenda trus ada 5 orang pribumi yg lari terbirit2 langsung manjet pu’un gara2 dikejar badak gokil. Hihihiiii… lucu banget! Pas masup ke wilayah yg tenang, kite curiga juga, bakal dapet kejutan apalagi neh… Ga sempet mikir lama2, tau2 aja dari daratan kanan-kiri kite, dari balik semak2 keluar orang2 suku pedalaman yg badan nye pd item dicoreng-moreng. Mereka treak2 ga jelas gitu, mungkin mereka lagi perang kali yeh… Trahir kite ngelewatin gunung brapi, yg tiba2 aja meletus keluar lahar. Apinye ampe ke aer lho…

Di kawasan ini juga, kite sempet nonton Festival of The Lion King. Kite nonton opera yg kereeeeeeeeeeen banget! Bagus banget ampe saye sulit nyeritain dg kata2. Kalo kalian suatu saat nyampe ke Disnilen HK, yg satu ini jangan dilewatin yeh. Gada rugi nye. Saye ambil beberapa poto nye diem2. Dilarang sih tapi saye nekat, tau2 aje saye disamperin petugasnye. Sambil nyengir saye bilang : Ups, sori ye mister…! (dasar saye nih orang katrok gatau aturan heheee…)

Kelar dari sini udeh jam 6.30, itu berarti bentar lagi Disnilen tutup. Karna semua atraksi brenti jam 7 malem. Penutupan nye keren banget, pake kembang api yg mewah-wah-wah… Brasa kaya taon baru dah…
Sebelom pulang, saye (untungnye) sempet beli 6 biji gantungan konci Disnilen yg bentuknye aneh banget (saye yakin di Jakarta belom ada) sama 4 biji gantungan kunci boneka mikimos yg ada embel2 HK Disneyland nya (ini sebagai pembuktian bahwa si Betawi Katrok ini bener2 nyampe di HK Disney)

Setelah itu saye ke tempat parkir bis, disini-nih saye nunggu rombongan yg pd blanja beli sopenir lama banget! Sampe2 jam 8.30 baru bisa kluar dari Disney. Gile bener… Waktu nunggu, saye sempetin jalan2 seputaran parkiran. Ternyata kite bisa ke Disnilen naek bis umum, ato kreta ato taxi (stasiun/terminalnye ada di kawasan parkir Disney lho, ga kaya Ancol yg kudu ke jalan raya). Jangan salah… Di sini taxi ada 3 jenis. Taxi yg warna merah tuh namanye Urban Taxi, ini khusus untuk rute dalem kota. Taxi yg warna ijo namanye New Territories, taxi ini ga bisa masup kota. Jadi kalo naek taxi ini, pas masup kota kudu ganti taxi. Trahir taxi warna biru, namanya Lantau Taxi. Taxi ini khusus perjalanan antar pulau. Lumayan repot yeh naek taxi di HK…!

Dari Disney kite ke Royal Plaza Hotel di Kowloon, ngurus ini-ntu plus pembagian konci trus Tur Lider nye ngasih waktu 15 menit kumpul di lobi lagi untuk dianter soping! AHA! Ini die yg ditunggu2 dari kemaren… Dasar tukang ngaret, waktu 15 menit mulur ampir 1 jam. Ugh, mo ngamuk dah!
Kite diajak ke lorong yg terkenal di Hongkong, nama nye Lady’s Market. Kaki Lima sih tapi di sini ngejual barang2 etnik khas China gitu. Dari mulai tas, cincin/kalung/gelang giok, kaos2 gambar Hongkong, baju2 cheong sam khas mandarin, sopenir2 Hongkong, pokonye segala macem ada di sini dah. Sayang banget kite dateng nye telat. Pas nyempe sini sebagian tukang nye tuh lagi nurun2in dagangan siap tutup kios. Kesel banget, dah! Andainya peserta pada bisa hargain waktu, pasti kite ga bakalan belanja kocar-kacir kaya orang ke surupan gini.

Saye beneran bingung kudu ke mane dulu. Akhirnye saye masup salah satu kios sopenir yg depan mata. Saye beli giok gantungan HP bentuk Tse Bu Xiang ampe 20 biji. Saye langsung aje bilang “HK$ 100 for 20, okeh?” Tukang nye kaget ditembak gitu. Saye cuek aje & dg pede ngerayu2 die pake jurus jitu “Komon, Yang Yi… Ayem yor bespren, dets rait…?” Hahahaaa… gebleg! Best friend apa-an, ketemu aje belon semenit! Yang Yi tuh artinye Mbak Yg Cantik (Yang Cai : Mas Yg Ganteng) ini dipake untuk ngerayu tukang dagang. Lokal Gaet saye yg ngajarin. Kenapa saye langsung tembak 20 gantungan HP HK$100? Soalnye waktu di pabrik giok, harga nye HK$ 100 cuman dapet 6 biji. Saye sih nekat aja, ngkali dikasih. Ya ngga? Taunya dikasih tuh (walo dg wajah terpaksa tampaknya… Mungkin penglaris mo tutup kali yeh). Sekalian aje saye beli gantungan tas dari giok bentuk Tse Bu Xiang juga 10 biji harganye HK$ 100. Soalnye lebih gede 4x lipat dari ukuran gantungan HP. Saye jg beli kalung giok etnik bentuk Tse Bu Xiang yg saye ceritain di awal. Abis itu saye beli gelang giok (palsu sih kayanye) Harganye cuman HK$ 30, trus 1,5 lusin sopenir Hongkong dari besi, kaya nye untuk tempat memo ato surat gitu deh. Soalnye pake kotak, jadi ngasih nye kan enak. Saye beli 6 asbak kecil (bisa dikantongin) dari besi yg bentuk nye bulet kaya jam kalung zaman VOC dulu, yg kalo tombol nye diteken kebuka & kluar tempat naro rokok nye. Bagus & unik, sayang nye saye lupa ngitung, temen saye yg perokok ada brape orang. Pas sampe Jakarta ternyata kurang. Sayang nye lagi, saye lupa preksa lagi, tombol nye lancar apa kaga. Sampe Jakarta cuman 1 yg lancar 5 lagi macet. Malu2 in deh! Gapapalah, tp kan tetep aje bentuk nye unik & ada tulisan Hongkong nye. Asbak ini pake kotak juga, jadi kesan nye mewah. Padahal harga dua jenis barang ini ga mahal lho. Biasa deh… Cincaylah… Hayyaaa… Masih inget dong, kemampuan saye yg terdiri dari 15% bakat 85% nye lagi nekat…

Abis ntu saye beli gelang dari porselin. Di Jakarta ada, tapi yg disini lebih bagus. Soalnye gambar bunga timbul nye ampe dalem, yg di Jakarta kan luarnye doang. Dg harga perdamaian (saye gitu lho…) 12 gelang dihargain HK$ 100 saja. Saye beli juga gelang porselin yg motif nye sama kaya yg pertama cm bentuk butiran dironce gitu. Harga nye HK$ 100 tapi cuman dapet 10 biji (dapet 10 koq bilang cuma? Dasar…!) Karna saye kaga pindah kios sama sekali, saye dapet gips tempelan kulkas gambar tempat2 di Hongkong (Avenue of Art, Cing Ma Bridge, Bauhinian Square, Kapal Jukung, Long Boat, Clock Tower dll ada 20 jenis) sebanyak 40 biji dg harga yg miriiiiing banget! Soalnye waktu balik ke bis, temen saye pamer bahwa die dapet tempelan kulkas dg harga yg murah banget, tapi begitu tau harga punya saye lebih murah dari die, wah ngamuk berat tuh. Hahahaaa…

Trus saye ketemu temen yg beli kaos bordiran yg bagus banget harga nye HK$ 30. Wah, mau dong… Sayang nya tuh kios udeh tutup. Yaaahhh…! Tapi saye sempet beli 8 tas bahan motif etnik China HK$ 100. Pokoknye semua serba 100 deh, saye males nawar satuan, ntar mahal. Kan kalo langsung 100 kesan nye kaya borongan gitu (pas di Victoria Peak, tas ini yg ukuran nye lebih kecil harga nye HK$ 29 cuman dapet 1 biji. Wah, mahal banget kan tuh!)

Kaos kaga dapet, Sepatu juga kaga dapet, saye coba nyari pembatas buku bentuk etnik khas China pesanan temen saye tapi kaga ketemu. Mungkin karna kios nye udeh banyak yg tutup. Kalo masih lengkap pasti dapet. Saye ketemu temen yg laen & diseret2 suruh bantuin nawar gantungan konci. Rata2 yg laen dapet harga HK$ 10, saye coba tawar menawar, harga terakhir dapet HK$ 6. Temen saye seneng banget. Saye jg jadi ikut2an beli 20 biji. Pdhl tiap plesiran kemana2 saye tuh paling males bawa oleh2 gantungan konci. Gantungan konci? Bukan saye banget tuh! Untung nye saye beli, lumayan buat bagi2 OB & sopir di kantor. Mereka girang banget saye kasih masing2 3 jenis benda : gantungan konci, gantungan HP ama tempelan kulkas. Pdhl harga nye ga seberapa, itung2 sebagai tanda inget ama mereka lah.

Dari Lady’s Market saye masih nyoba jalan ke pertokoan di lorong sebelah nye. Aduh mak! Ada butik yg lagi obral sepatu clark gila2an! Bayangin aja, saye liat dari depan kaca, sepatu yg di bandrol HK$ 1.300 dicoret jadi HK$ 200 doang! Pokoknye rata2 harga nye tuh HK$ 200-400. Wah, mao doooong…! Seumur2 mana mampu saye beli sepatu ginian. Sayangnye tuh kios ude tutup, saye bisa ngeliat dari kaca karna emang tinggal rolingdor nye doang yg belon ditarik. Mo nangis deh! Dan rasa nye saye mo nimpuk kaca toko itu supaya saye bisa masup & beli… (wiiih… kriminal!)

Pada akhirnye oleh2 yg saye beli di hongkong cuman cindera mata doang tuh, slain 8 tas bahan yg emang udeh saye niatin untuk 8 temen saye yg waktu mereka jalan2 ke Bali ngebawain saye oleh2. Cindera mata dibagi abis, semua kebagian. Sampe2 keluarga saye nyaris ga dapet apa2. Enyak-Babe cuman prahu jukung dari giok, ade2 saye cuman liontin shio ama gantungan konci yg bentuknye aneh yg saye beli waktu di Disnilen, saye sendiri cuman dapet tas kantor yg saye beli depan hotel. Temen2 saye ampe heran. Biarin dah, kalo orang2 itu seneng dapet oleh2 dari saye walo kaga sebrape, mudah2an itu jadi do’a supaya saye taon depan bisa ke sono lagi. Asiiikkk…!

Malem itu tidur saye kaga nyenyak karna masih terbayang2 sepatu Clark yg saye liat di toko. Saye masih kepikiran dg janji saye buat bawain ade saye si bungsu sepatu ama titipan pembatas buku temen saye. Harus cari kemane dong… Pagi nye, saye duduk2 depan jendela hotel, kaya’nye di luar dingin banget tuh, soalnye gerimis & dari atas saye liat anak2 sekolah pada liwat pake payung. Hari ini Senin, 19 Maret. Di Indonesia tanggal merah karna hari Raya Nyepi. Kaya nye sih disini ga kenal hari nyepi tuh…

Hari ini rute nye ke Victoria Park, tujuan utamanye Madame Tussaud’s Wax Museum alias musium lilin. Jalan ke Piktoria Pak ini kite ngelewatin terowongan bawah laut yg namanye Hung Hom, katanye dibuka taon 1972. Trowongan bawah laut ini bukan digali lho, tapi pake pipa. Pendek sih, cuman 2 km doang. Tp kan hebat. Ya ngga? Oiye, kata nye, kalo kite naek taxi trus tuh taxi mogok di trowongan, yg harus bayar ongkos dereknya tuh penumpang lho. Yah sekitar HK$ 400 an gitu deh..

Hari ini lebih dingin dibanding kemaren. Gatau brapa drajat. Yg jelas idung saye ampe sakit & kluar darah saking dingin nye. Padahal waktu saye plesir ke Bromo yg rasanya lebih dingin dari ini, saye kaga sampe mimisan tuh.
Mungkin ini epek negatip dari sepatu clark yg gagal saye beli td malem tuh… (huuu belebihan ah!)

Turun dari bis, kita nyambung kereta gunung yg namanya Peak Tram. Harga karcis nye HK$ 115 buat masup museum & HK$ 33 ongkos tram nye bolak-balik. Baru kali ini saye ngerasain naek kendaraan dg kemiringan 45 drajat. Kebayang ga? Saye nyoba berdiri di gang yg lantai nya udah dibentuk cekungan. Wal hasil saye sukses berdiri dg badan lurus tapi condong ke belakang. Ajaib! Kalo dalam keadaan normal, pastinye saye udeh ngusruk celentang ke belakang & badan saye ringsek dg sukses…!
Masup musium, patung lilin pertama tuh si Jacky Chan. Yg mo poto bareng die kudu bayar HK$ 90. Ih, ngapain amat, saye kaga ngepens2 amat ama die koq…
Masup ke dalem nye lagi kaya super star lho…! Soal nye begitu masup langsung disambut kilatan blitz kamera wartawan & gambar kerumunan wartawan yg ngacung2in mikropon minta wawancara ama kite. Serasa seleb deh…! (maksud nye sih serasa jadi SELEBritis, apa daya ternyata cuman SELEB KULIT 88…!)

Di dalem bebas poto. Saye poto bareng edi murpi idola saye, trus bretpit kejepit, depit bekam, raja-ratu inggris & blanda, bil klinten, sadam husen, einstein, d’bitel, mikel jeksen trus apalagi ya… Lupa deh, abisnye banyak sih. Soalnye ini kan tempat wisata trahir… Sayang nye saye ga liat patung nye si Madame Tussaud. Katanye ada di dalem agak kepisah & orang nye kecil. Wah yg mana ye…? Ga inget lagi tuh.

Keluar dari museum lilin ini, kite2 pada ke toko Hard Rock Hongkong. Penuh banget, padahal toko nye kecil. Saye nyingkir dah, lagian saye liat model nye gitu2 doang. Mendingan saye makan es krim. Tapi pada akhirnye saye nyesel juga tuh… ternyata di pojokan belakang kasir ada kaos Hard Rock model terbaru, warna item yg tulisan nye tuh timbul2 warna coklat. Jadi antik kaya kayu gitu. Harga nye HK$ 160. Sesuailah… Kayanye di Jakarta belon ada tuh… Ya udah deh, mo gimana lagi...
Di Pik saye ngeliat pemandangan Hongkong dari kaca deket pintu masup musium lilin. Baguuus banget! Saye kaga tau (Lokal Gaet nye jg kaga bilang tuh) bahwa kite sebenernye bisa naek lebih tinggi lagi buat liat pemandangan. Payah tu org, jahat amat ngasih tau nye pas ude dalem bis. Nyebelin banget…!

Turun dari Piktoria Pik, ga naek Pik Trem lagi. Sayang yeh, padahal ude bayar bolak balik lho. Kite naek bis, turun ke bawah muter2 ampe pusing & eneg. Saye kirain saye doang ternyata semua juga sama menderitanye.

Dari sini kita makan siang di Jumbo Floating Restaurant Ship. Jadi kita tuh dibawa ke dermaga, trus naek prahu sedikit lalu makan di atas kapal yg besar. Waaah… seru neh, sayang lagi2 makanan nye terlalu biasa untuk lidah saye yg katrok ini. Pokoknya makanan Indonesia tuh is de bes lah! Gada yg laen…
Selesei makan kite teburu2 ke pelabuhan (apa ye namanye saye lupa), masalahnye kita kaga bole telat naek Viva Macao lagi buat mudik ke tanah aer. Ahirnye keburu juga sih, setelah keluar dari imigrasi Hongkong (bagusnye gada kendala) kite naek Jet Cat ke Macao. Dg karcis seharga HK$ 122 perjalanan lewat laut kite rasain juga tuh. Begitu merapat, kite langsung naek bis ke imigrasi Macao di Bandara. Ketat banget neh pulang nye. Kite kaga bole bawa apapun yg bentuknye cairan ato liquid. Tau ga, yg bandel bawa aer mineral, sop dring, parpum, bahkan odol, tetep ketauan & kudu bongkar tas. Kluarin tuh smuanye, gamao tau! Gile yeh (tapi kemaren saye baca di koran, per 30 Maret emang udah berlaku peraturan kaya gitu di tiap bandara. Tapi kan hari itu baru tgl 19…). Dah gitu, pas ude liwat yg gini2an, pake dipreksa detektor segala. Kite disuruh bediri di undakan gitu, buka jaket, tangan direntangin. Parah nih Macao! Mao nye apa sih?!

Nyaris kite ketinggalan pesawat gara2 urusan imigrasi & detektor masup bandara! Sukurnye jam 7 akhirnye kite tek op juga. Tumben baru kali ini saye dapet korsi di jendela yg kaga pas di sayap. Jadi saye bisa ngeliat keluar & dadah2 ke Macao, Hongkong, Disney, semua nya. Dadaaah tunggu ye, saye kayanye mao balik lagi, neh…

Waktu mendarat sedikit aneh, saye ngeliat kapal ini muter2 di tempat yg sama. Waktu mo mendarat pertama, pesawat nye naek lagi. Gatau kenape tuh. Ternyata yg nyadarin ini bukan saye aja, tapi orang2 yg duduk deket jendela juga. Pas mereka cerita, lho… koq sama. Wallahu ‘alam lah. Yg penting saye sekarang udeh slamet, buktinye sampe skarang saye masih napas...

Udeh, ceritanye segitu doang. Kaga seru yak? Maklum Betawi katrok yg baru buka mata, lagian waktunye terlalu sebentar. Kudunya mah paling kaga minimal seminggu dah, itupun kaya nye masih mepet juga waktunye….
Oiye, buat yg pernah ke tempat2 yg saye critain, trus ternyata ada dari crita saye yg kaga sesuai, ya ma’ap deh. Namanye aje baru sekali melancong ke kampung orang. Ini juga udeh pake perenungan yg panjaaaaang banget buat mindahin ke tulisan. Bisa aje saye salah ato lupa.

Xie-Xie yeh, udeh mao luangin waktu buat baca pengalaman saye si Betawi Katrok yg belagu banget pake ngewujutin ngimpi plesiran ke Hongkong segala.
Kalo ada sale2 kate, ma’apin saye yak... Gutbay dadaaaahhh…!

Label: plesir