Bulan Maret 2007 kmaren saye melancong ke China. Karna cuman punya dana se iprit tapi pengen banget ke sono (ini jg dapet ngumpulin honor lembur setaon…), yaudeh saye n d’gank nego sane-sini ame 5 agen wisata. Ahirnye dapet juga harge mati (udeh termasuk tips ini-ntu dah, pokonye bersih) US$ 598 ditambah piskal sejuta & erpotek 100rebu buat 3 hari 2 malem, asal nyang ngikut lebih dr 20 orang. Kepaksa dah jadi sales dadakan nawar2in ke sape aje nyang mo gabung. Taunye dg ongkos segitu banyak nyang minat, walhasil kekumpul 29 orang.
Saye & grombolan tek op jum’at (16/3) tengah malem jam 23.55 naek VIVA MACAO, maskapei penerbangan baru nyang lagi promo, mangkenye jadwal terbangnye tengah malem & harga karcisnye murah meriah…
05.30 WIB (wkt Macao tambain atu) kite nyampe di Macao & dipreksa imigrasi kaya teroris! Denger2 sih (tau bener ape kaga…), Macao rada gimane gitu ama org Indonesia, katanye gara2 masalah Timor Leste. Maklum deh, pan katanye Macao pernah dijajah ama Portugal (ape sangkut pautnye ye, saye kaga ngarti..). Paspor kite ampe dipotokopi segale lho… (apa emang gitu ngkali aturannye yeh…) Di imigrasi ntu kite ketemu rombongan babe2 klub golep dari Surabaya. Romannye sih mereka WNI turunan China, tapi anehnye mereka ntu pd sibuk ngobrol pake bahase Jawa Timuran campur Indonesia, kaga ngomong China ato Inggris. Malahan ada nyang sibuk nyari2 penerjemah. Aneh, bukannye ini negri nenek moyang nye? Pantesnye mah misalnye ye, kaya nyang moyangnye Jawa biasanye suka ngobrol pake bahasa Jawa juga, jadi kliatannye pas gitu dah… (saye sok tau banget dah…)
Slesei urusan imigrasi, nyang mo sholat subuh yaudah sholat sambil duduk di ruang tunggu. Kebetulan saye lagi off jadi kaga terikat waktu2 wajib. Saye cuci muke ame sikat gigi, saye pikir nanti pas nyampe hotel tinggal mandi dah.
Kelar segala urusan sholat n jamban (bahase keren nye toilet yeh…), kite naek bis ke perbatasan di Zhuhai. Dari bandara ke perbatasan lewat jalan layang yg mirip jalan tol ke Bandara Sukarno-Hatta punye kite, tapi bawenye laut. Asli kanan-kiri laut. Kereeeen banget dah! Pegimane bikinnye, yak… Sayang saye kaga bisa ngambil gambarnye karna taunye suse ngambil poto dari dalem bis. Udeh saye coba tapi hasilnye brantakan gitu dah (maklum amatiran neh…)
Samping kiri jalan (di tenga laut juga) ada tempat judi nyang baru buka, namenye SANDS. Pantesan, waktu saye ngidupin henpon pas nyampe di Macao langsung masup sms Welcome to Macao n visit SANDS! Gile bener… Maksud loe???!!!
Macao tuh kota yg bersih & tratur. Pokoknye gut-gut-gut lah! Perjalanan cuman 15 menit sih, tp kbayang kan, kite lagi2 kudu nyeret2 koper ame nenteng2 paspor buat dipreksa urusan keluar dari Macao ama masup Zhuhai. Bukan maen dah ahhh…!
Oiye, di Macao ada yg namenye Aberdeen Fishing Village, sayang kite kaga ade siti tur Macao. Sebelon nyampe di perbatasan, kite ngelewatin flat-flat yg mirip banget rume susun Kebon kacang yg deket kampung saye. Temen2 pd poto2 di situ, saye mah cuman bisa ketawa aje… Ternyate ada yg lebih katrok dari saye… Pan mane orang percaya liat poto kaya gitu ngaku di China…?07.30 WIB (saye kaga rubah jam, soalnye males…) Ahirnya kite udeh bisa brangkat ke Shenzhen naek bis. Bukan bis nyang tadi ngangkut kite dari bandara lho. Di sini banyak peraturan. Bis Macao kaga bole masup Shenzhen, nanti pas ke Hongkong bis Shenzhen juga kaga boleh masup Hongkong. Tapi curangnye, bis Hongkong bole masup Shenzhen. Kaga ngarti…! Atu lagi, Lokal Gaet yg nyambut kite di Macao td tugasnye cuma sampe Zhuhai, di Shenzhen Lokal Gaet nye laen lagi pas di Hongkong juga kite ganti Lokal Gaet (baliknye dari HK ke Macao juga ganti lagi lho…) Walah-walaaah… Bener2 singkong diragi-in, tape deeeh…!
Sebelon kite ke Shenzhen, kite sarapan di Hotel Jumbo-Zhuhai. Bukan tempat kite nginep lho, karna kite nginep nye di Shenzhen. Pagi2 gini kite kaga bakalan nemu sarapan nasi uduk ato ketoprak, nyang ada bubur encer pake telor mentah + daging sapi. Lauknya ceker ayam ame somay (maksudnye dimsum kali yeh…). Pilihan lain nye bakpau isi srikaya ato kacang merah. Ato kalo kite mao, kite bisa nyobain kue khas Zhuhai, nama China nye lupa, tapi artinye kue gula merah. Kue ini mirip kue apem, warna nye coklat & lembut bgt. Semua rasa makanan nye lumayan sih, tapi lebih enak masakan kite kemana2 dah! Tapi sebenernya saye kaga nyobain bubur encer + ceker ayam nye. Bayangin aje, bubur yg encer kaya susu gitu tenga nye ada telor mentah, trus ceker ayam nye gede2 kaya tangan anak orok. Males banget, dah…!
Kelar makan, saye nanya ame Tur Lider dari Agen Wisata, kapan kite sampe hotel trus mandi pagi nehhh…? Jawaban nye (amit-amit dah…) Lho, kita ga ada waktu mandi. Kita langsung city tour sesuai jadwal, setelah slesai smua baru kita ke hotel di Shenzhen…
HAH?! Kite pan pd baru bangun tidur td di pesawat, masa mao langsung kluyuran jalan2 di negri orang? Malu2in… Saye sih udeh cakep lagi, pan tadi udeh sikat gigi, cuci muke, ganti bedak, cuman baju doang neh nyang blom ganti. Semua pade liat2an, saye cuman bise nyengir seneng… Biar belom mandi, saye satu2 nya orang nyang paling cakep, bersih & wangi di rombongan ntu heheheee…
08.50 WIB slesai sarapan pas kluar dari resto… Brrrr buset dah… DINGIN!!! Padahal penampakan cuacanye biasa2 aje kaya jam 7 pagi di Jakarta. Tapi angin nye tuh kenceng banget, kliatan dari pohon2 yg goyang nye lumayan heboh & lampion2 yg kaya dilempar2 inpisibel hen!
Perjalanan Zhuhai ke Shenzhen pemandangan nye enak diliat. Dimane2 bersih n tratur. Di sini mobil cuman boleh pk spid 60 doang. Ga ada motor, nyang banyak tuh sepeda itupun mereka ada jalur sendiri. Tertib kaga kaya Jakarta, jalur busway aja suka dipake ama mobil2 bagus. Katanye terpelajar tapi pada kaga ngarti aturan…!
Oya, di China (nyang saye datengin Macao-Zhuhai-Shenzhen) semua serba tebalik. Jalan di sebelah kanan, kendaraan juga di sebelah kanan, sopir di kiri, makanye rada kagok neh pas mo naek bis, pintunye di kanan. Tp di Hongkong sih semua nye balik ke posisi semula sama kaya Jakarta…
Saye sempet ngeliat 3 motor lagi parkir bareng yg punya nye nangkring di pinggir jalan kaya tukang ojek. Waktu saye tanya ke Lokal Gaet, ternyata emang beneran tukang ojek. Aneh tuh, soalnye saye kaga liat motor 1 pun kecuali 3 motor nyang lg mangkal ntu. Jadi kapan motornye jalan & jalan di jalur mane, saye kaga tau dah...
Jalan di tol Zhuhai-Shenzhen + 2 jam, nglewatin banyak banget jembatan. Sempet lewat JALAN PACARAN. Aneh ye namanye… Saye sempet moto dr dalem bis. Gatau deh kalian percaya apa kaga, soal nye pas saye liat gambarnye mirip ancol. Model nye tuh pinggir pantai, ada taman, rumput, bersih banget, pemandangan ke laut lepas, liat kapal2 kecil ama perahu nyang lagi nyender di dermaga. Bagus sih… Katanye kalo wik en banyak pasangan yg jalan2 ke sono. Di taman nye saye liat ada sepeda kumbang warna-warni dijejerin. Menarik banget dah. Ternyata sepeda ntu disewa in buat nyang mao jalan2 di sepanjang Jalan Pacaran ntu. Saye pengen nyoba, tapi nye kite kaga ade jadwal jalan2 di Zhuhai. Yaaahhh…! 
Oiye, Zhuhai tuh artinye Zhu = mutiara, Hai = laut. Ini karna Zhuhai emang terkenal sebagai penghasil mutiara laut. Di salah satu sisi Jalan Pacaran, agak ke tengah laut, ada patung Dewi Kwan Im warna emas yg lagi megang mutiara. Yah ngkali mirip2 patung Liberty nyang lagi pegang obor dah… Banyak org ke tempat patung ntu & pemandangan nye emang beneran bagus (prasaan di China kaga ada tempat nyang jelek dah…) Sayang kite kaga bisa mampir, slaen gada di jadwal tur, bis kaga bole brenti di situ. Saye sempet moto sih, tapi jelek soalnye ketutupan pu’un, karna sepanjang jalan pacaran pu’un bejejer rapet, jarak antar pu’un kurang lebih 1 meterlah. Jadi biarpun saye usahe stenga mati buat moto dari dalem bis, tetap aje nyang keliatan cuman pu’un doangan.Slama perjalanan 2 jam ini, kite gabisa sembarangan brenti walopun itu darurat karna kebelet pipis… Tau ga, orang Indonesia tuh di China identik dg 2 hal : JAMBAN ama BELANJA (baca : toilet n shopping) Heheee.. parah yeh…?! Katanye smua Lokal Gaet dipesenin buat ingetin turis Indonesia, buat nyang klep nye ude bocor disaranin bawa botol kosong bekas aer mineral utk nampung pipis nye. Ampun dah! Untung nye saye tiap melancong tuh slalu jaga makan ame minum karna saye bukan tipe org nyang bise masup toilet dimane aje. Jadi saye kaga makan yg pedes2 ato yg asem2, saye juga batesin minum. Kalo beneran haus baru minum, ntu juga saye sesuai in dg kebutuhan badan. Kalo kelebian pan perlu ngebuang…
Tp stetmen (caelah!) bahwa orang Indonesia identik dg jamban tuh ternyata bener! Rombongan saye ternyata rombongan beser! Nyebelin dah…! Waktu tur abis cuman buat urusan jamban. Tiap brenti pasti nyari jamban. Walopun 15 menit lalu baru brenti & pada masup jamban, tetep aje pas brenti berikutnya mereka nyari jamban lagi. Tur Lider ama Lokal Gaet cuman bisa ngurut dada ama geleng2… Sedangkan saye sebage satu2 nye orang nyang males ke jamban modern, nyang bersih2nye cuman pake tisu doangan, jadi lumayan bete nunggunye. Kalo ada orang nyang punya indra ke enam, ngkali bisa ngliat di pala saye udeh tumbuh tanduk ama ngebul berasep…
Masup Shenzhen, kaya biasa kite lagi2 dipreksa imigrasi, nyeret2 koper, wara-wiri bawa2 paspor, sebagian ditanyain ini-ntu, yg maksudnye mo nanya apa-an kite juga pada kaga ngarti. Bahasa Inggris jeblok, China apalagi… Gelap! Ngerti nye cuman cepe, gope, ceceng, goceng, cetiau, gotiau ama… Kamsia ya Nci…! (hehe glodok banget, yak!)
Oiye, di jalan kite ngelewatin Zhong Shan, kampung halamannye Sun Yat Sen. Kalo kaga salah inget neh, die Presiden nya China jaman sebelon dikudeta ama Mao Zhedong si komunis. Bener apa kaga saye juga lupa. Saye mo nanya malu, ntar dikira males waktu sekolah. Padahal emang iye! (hehe) Kita juga ngelewatin Tungkwan, daerah yg bikin jeans. Tp kaga mampir lho…! Mendingan ke Cihampelas Bandung deh...
11.25 (WIB lho…) sampe di Shenzhen langsung makan siang! Katanye di sini terkenal dg masakan ala Shezhuan yg pedes. Okelah, saye coba in dah. Sayur yg pertama, sumpah rasanye kaga karuan & wujudnye kaya aer cucian piring. Boro2 pedes, dah!
Menu kedua kesukaan saye : Udang mayones! Hmmm… Haoche!
Sayangnye di atas udang itu ditaburin kuning2 kaya rumput kering nyang rasanye kaya pisang : manis! Menu nyang kudunye enak jadi brasa aneh. Kebayang kan, gurihnye udang mayones campur manisnye pisang parut garing. Enak sih, tp kaga pas. Ya lumayan dah drpd sayur nyang tadi…!
Menu ketiga kerang ama kulit-kulitnye nyang cangkangnya guede banget tapi isinye se iprit! Lumayan tp kurang bumbu (saye sok tau bener ngomongin bumbu, padahal masak aer aje angus! Boro2 ngarti bumbu, bedain jahe ame kunyit aje bingung…)
Menu keempat sayur ijo. Bentuk sayurnye kaya kangkung tapi batangnye gendut2 & daon nye dikit. Rasanye enak, gurih & digigitnye garing tapi di dalem kuahnye ada potongan telor rebus nyang dibungkus ager2 bening. Nah lo…! Aneh kan…? Saye coba in tu telor rasanye standar lah, kaya telor ama ager2 aje gitu...
Abis itu cumi pake tepung yg rasanya woasssiiin banget! Trus ikan patin goreng nyang bentuknye ajaib. Ikan utuh masih ada kepala ama buntutnye tapi daging badannye kotak2 gitu kaya mangga di iris ala tiker. Ga kebayang ye? Saye juga suse nih nyeritain nye. Saye coba in sih… Enak! Walo saye kaga suka ikan, tapi boleh dah. Abis itu ayam rebus yg dipotong kecil2. Saye cobain secuil tapi langsung saye buang lagi. Amis ah! Trahir jagung pipilan yg di… diapain ye…? Ngkali disangrai (digoreng kaga pake minyak) trus diadukin bumbu kiju. Rasanye enak banget! Hmmm… jd mao lagi dah!
Di rest room (duileh!) resto sini, saye sempetin ganti baju. Asiiikkk… saye jadi seger dah! Masalahnye yg laen kaga bisa ganti baju karna bajunye semua ditaro di koper & kopernye ada dalem bagasi bis… Kalo saye sih emang udeh nyiapin 1 stel baju di ransel nyang saye bawa kemane2…
12.45 (WIB ya…) kite ke pabrik giok punya pemerentah di Shenzhen. Namanye Shenzhen Xingyu Mineral Museum. Menurut kepercayaan orang China, giok tuh punya 2 khasiat : bawa kebaekan ama buang sial, tergantung warnanye. Ijo muda : kesehatan, ijo tua : kebahagiaan, ungu : panjang umur, kuning : narik rejeki, pink : buat nyang cari jodoh… Ada2 aje ye…
Sebelon beli giok, kite diajarin cara bedain goik asli ame palsu, bisa dari warna & seratnye, bunyinye, beratnye, satu lagi : giok nyang asli bisa ngegores kaca. Ternyata giok tuh bisa disuntik, giok palsu seratnye suntikan, kaga ngarti dah pegimane care nyuntiknye… Di sini saye beli giok nyang bentuk prahu jukung khas Tiongkok warna ijo tua buat di taro di rumah Maknyak saye di kampung.
Di ruang etalase, kite disambut pelayan nyang langsung make in gelang giok ke tangan. Padahal sempit sampe kudu diolesin henbodi, tapi die bilang pake giok tuh emang kudu ngepas, jadi kaga dicopot2 lagi. Nanti kalo tuh giok cocok ama badan kite, warnanye bakal tambah pekat & seratnye tambah jadi.
Oiye, giok yg udeh somplak jangan dipake lagi yeh, kudu dipecahin sekalian. Soalnye nanti bawa sial (kata mereka). Yg jelas, gelang nyang di tangan saye ini harganye mahal (fiuh!) Bandrolnye 2.280 Yuan alias Rp 2.731.440. Nyaris 3 jeti cuman dapet gelang?! Males banget! Bisa2 nasib oleh2 saye nyang laen wassalam sampe di sini… Lha uang jajan nyang saye bawa aje kaga nyampe segitu. Beneran dah…
Saye suruh pelayannye copotin itu gelang dari tangan saye, tapi die kaga mau malah nurunin harga ampe 1.300 Yuan. Saye tetep nolak & die bilang, brapapun harga yg saye minta, bakalan dikasih. Yaudeh, saye iseng2 bilang 100 yuan dah… Die ketawa : Kaga bisa! Yaudah, kalo kaga bisa mah buruan copotin dong… Die ngotot tawar menawar & saye liat temen2 nyang kantong nye tebel mulai bayar giok yg udeh nyantel di tangan masing2. Biarpun pengen, tapi saye pan kudu ngukur kantong… Tau ga, akhirnye saye bayar brape tuh gelang? Cuman 250 Yuan! Hahahaaa… udeh rejeki kali yeh... Saye sih diem2 aje waktu dapet harga sebagus itu (bayangin aje, dari 2.280 jadi 250), tapi pas di bis trus yg laen tau, wah… yg laen pada kesel ama saye!
Lupa cerita, nih… Shenzhen tuh baru jadi kota taon 1980, jadi umurnye baru 27 taon, makanye Shenzhen punya 3 nama : Hongkong Ke 2, Kota Muda ama Kota Pendatang (soalnye paling banyak migrasi nya…)
Di Shenzhen cuman mobil yg plat biru yg bisa masup Hongkong sedangkan mobil2 Hongkong yg bisa masup Shenzhen yg platnye 2 biji : 1 di tengah (normal) 1 nye lagi di kanan bawah. Jadi di China tuh apapun kaga bisa sembarangan…
Satu lagi, di tempat usaha ama rumah2 orang China, pasti suka liat patung yg (ma’ap nih, kata saye sih) aneh… namanye Tse Bu Xiang yg artinye 4 kaga sama. Wajar, soalnye tu hewan kepala nye naga, kaki nye kuda, badan nye cilin (ini hewan gatau bentuknye gimana, katanye ga punya anus & gambarnye ada di duit HK$100), trus 1 lagi apa ye… Wah, lupa! Simbol 4 ini ada artinye, tapi lagi2 saye lupa,… Pokoknye buat hoki lah. Makanye kalo liat patung hewan ini di rumah orang China, pasti ada dalem kaca. Soalnye takut ada yg pegang2 sembarangan yg akibatnye hoki nyang punya rumah bisa pindah ke orang nyang megang tu patung...
Waktu masup pabrik giok, Lokal Gaet nyaranin kite2 buat ngusap patung giok Tse Bu Xiang yg ada depan pintu, mulai dari kepala ampe kaki, trus masupin ke kantong. Katanye, supaye pulang dari sini kite dapet banyak rejeki. Yah, namanye budaya, ye... Die juga nunjukin kalung giok yg die pake bentuk Tse Bu Xiang, katanye kalung ini kaga bole dipegang orang laen. Saye tertarik beli, bukan urusan hoki lho, karna pas jadi kalung bentuknya etnik gitu. Saye akhirnye dapet 1 di Ladys Market Hongkong. Harganye HK$ 30, abisnye mo beli yg di pabrik mahal banget, saye tawar HK$ 100 kaga boleh. Yaudeh, palsu ga masalah dah, yg penting kan gaya. Terbukti pas sampe Jakarta gada yg punya & temen2 pd ngiri liat kalung saye. Yg ga ngikut ke Hongkong juga pd marah, kenapa ga dibawain oleh2 kalung ntu…! Yah, akhirnye kalung ntu saye lepas juga buat salah satu dari mereka.
Oiye, waktu saye sibuk tawar menawar gelang, ternyata temen2 pada beli teh leci di situ, harganye 100 Yuan dapet 5 kaleng. Kalengnye cakep dah, kaya tempat parpum persase punya temen saye. Saye kaga tau, jadi kaga beli. Pas di Jakarta saye nyobain rasanye enak banget, agak manis & wangi leci.
bersambung...
Label: plesir
